Second Life Blog

كل الناس تستحق منى اعتذار أنا اللى بالنسبة لى الصدق انتحار أنا المصرى بكل افتخار أنا اللى فاقد لاختيار حتى فى دمى بسمح بالهزار حتى فى موتى بهمس باعتذار و الحق أقولك أنا المصرى و أخلاقى فى انهيار جريت ورا اللقمة و الهدمة و اللحمة و الخضار شفت بس النهاردة و ناسى بكرة باستمرار مشيت جنب الحيط و برضه مسلمتش م الأذى و لا لوم ع الحمار و الله أنا المصرى و مالى قرار اكمنى عايش دايماً فى انتظار و أنا اللى سامحت فى حق عيالى فى المدرسة بكل خبالة و استهتار أنا اللى حللت الفرار قولوا كافر أو اضربونى بالشباشب أو حتى اعدمونى بالخيار بس قولوا لأه للحمار أو أقله صالحوا نفسكوا باعتذار

عايز أبطل أقول عايز
عايز أبطل يبقى حلمى احتياج
عايز أبطل أحب فى ثوانى
و جرحى يتلم ف ساعات
عايز أبطل أقول عايز
عايز أبطل يبقى حلمى من سُكات
عايز كلمة فلسطين ما تصبحش ذكريات
نفسى تكون فلسطين هيه كل الحاجات
عايز أبطل أقول عايز
عايز أبطل أحلم من الأساس

نفسى أرجع أبقى نفسى
أنا اللى خد منى الزمن أمسى
و إدانى غد تانى فى مراية حب كانت بتنسى
أنا و انت مين أنا اللى راحت منى نفسى
و انت اللى هان عليه يسمع منى فى موتى همسى

وصتنى يا عم صلاح بليلها المسحور
أنا كل ماجى جنبها ألاقيها بتقولى غووور
و ألاقي لها ألف سور عسكر و حرامية و زبالة بالكوم
و أنا بين كل ده فى حبها محشور
و أرجع أحط سن السيف على رقبتى لأجلها
أنا اللى منها و للا هيه اللى منى ؟
ايش تعمل السما فى العصفور

أوصـيك يا إبنـى بالقمــر والزهـور
أوصـيلك بـليل القاهـرة المســحور
وإن جـيت فى بالك .. إشـترى عقـد فل
لأى سـمرا … وقبـرى إوعـك تـزور
عـجبى !!